政壇：明天更好基金 搵莫樹聯做外援
尋日喺一個活動上見到明天更好基金行政總裁Karen鄧淑德，佢透露一班基金成員下月將啟程赴美，今年香港因政改諮詢而牽引連串複雜嘅政治議題，擔心團員可能被考起，所以基金特登邀請基本法委員會委員兼資深大律師莫樹聯隨團做外援。
鄧淑德（左）同基金理事陳明耀（右）出席活動時講起基金訪美團。
Karen話今次佢哋將到紐約同華盛頓進行為期四日嘅訪問，形式同往年一樣，主要係向美國政商界及傳媒簡述香港近況。今次照舊由基金執行委員會主席Ronni陳啟宗帶隊。雖然Ronnie一向好講得，又見慣世面，但係今年香港局勢零舍唔同，可能Ronnie驚唔夠講，又可能驚講到口水乾，所以要請專家去應付。咁今次會見嘅最高層政府官員會係邊位呢？Karen笑稱，佢哋仍未知確實人選喎！
