為阻止立法會財務委員會通過新界東北前期工程撥款申請，人民力量陳偉業與陳志全可謂奇招盡出，過去兩日喺大會上不斷瘋狂響鐘要求點算開會法定人數，搞到建制派疲於奔命。不過，尋日終於排到議員「田少」田北俊提出嘅「確保公營房屋及基建工程如期落成」動議辯論，但田少喺發言唔夠十分鐘時突然宣布撤回議案，令大家可以提早收工。

田少喺開始發言時話，人力兩位議員喺過去兩日不停無聊同無限要求響鐘點算人數，令會議效率低，加上有四位議員就其原議案提出修訂，包括刪除輸入勞工計劃等字眼，估計議案都無乜機會可以順利通過。佢又話，既然議案唔可以獲得多數議員支持，再辯論落去都只會浪費議員時間，因此決定撤回議案。

聽到田少咁講，唔少建制派議員即時拍枱表示歡迎，立法會代主席梁君彥隨即宣布休會，唔少議員亦興奮地大叫「好嘢」。據知情人士透露，早幾日前，田少見到其他議員提出嘅修正案，深知原議案一定凍過水，加上田少呢兩日有唔少約會，所以決定撤回議案喎！

第一手消息請下載on.cc東網iPhone/iPad/Android/Windows Phone Apps