政壇：6．22公投延長泛民怨冇得抽水
負責為「佔領中環」行動舉辦「六二二公投」嘅港大民意研究計劃，近日自爆再次遭黑客攻擊網站，並聲稱今次攻擊嘅規模之大係「史無前例」。由於對黑客束手無策，港大日前公布延長實體票站投票日期至二十九日，即共十日，力谷投票率，但據聞有泛民團體同政黨私底下對安排有微言，擔心延遲公布投票結果，令佢哋對七一遊行嘅造勢行動大失預算。所謂投票事小，冇得「抽水」事大嘛！
設計圖片及對白
有泛民團體認為，投票日原定二十二日結束，即使翌日公布投票結果，佢哋都有成個星期時間畀政府回應，兼為七一遊行造勢谷人數。但依家二十九日先結束投票，三十日公布結果，第二日已經係七一遊行，變相中間冇機會畀佢哋「抽水」造勢，擔心影響當日遊行人數喎。咁都有得抵賴，乜市民唔係發自內心主動參與遊行嘅咩？
另外，佔中秘書處有意向「同路人」團體招手，加開實體票站進一步催谷投票人數，多個泛民團體一呼百應，單係白鴿黨就擬開放黨內全數六十幾個議員辦事處供市民投票。不過，據知港大民研總監鍾庭耀擔心，票站欠監察會容易「出事」招話柄，所以有意開放嘅票站，都要經鍾庭耀逐個審批同意，最終票站能唔能夠做到「遍地開花」仍然係未知之數。
叫警調查又拒絕合作
講番港大再遭黑客攻擊，事後有唔少泛民人士「抽水」質疑，港大民研已經唔係第一次遭黑客攻擊，點解警方成日都破唔到案，甚至暗示因為有關黑客有政治背景、源自內地，所以香港警方唔敢追查落去？
但有消息人士透露，警方唔係「揸流攤」冇盡力調查，但過去幾次向港大等報案人索取電腦文件同資料，對方都拒絕合作，警方亦奈佢哋唔何，結果不了了之。究竟係泛民團體信唔過警方，抑或佢哋有「不能說的秘密」？真係不得而知。
我哋聯絡過鍾庭耀，但佢就未有回覆。
