碼頭食肆無電用 港府官僚冇鬼用
政府工程最大特色就係「例遲」，無論規模大定細，難度高定低，從西九文化區到港鐵工程，幾乎無一例外。嗱嗱嗱，話口未完又一劑，今次係屬於中型工程嘅新灣仔碼頭無法按時供電，不過冇得賴天雨賴地硬，只能賴當局規劃失當擺烏龍。
件事係咁嘅，灣仔碼頭拆卸重置，原來計劃新碼頭今年第三季啟用，航線仲由天星小輪經營。港府諗住將兩層高嘅新碼頭第二層出租畀食肆，等渡輪公司有更多非票務收入，唔使成日嗌加價吖嘛，點不知因為做嘢甩漏，新碼頭冇設電力變壓房，啟用初期冇電畀食肆開檔，你話渡輪公司點招租吖！
土木工程拓展署仲死撐，話原先諗過喺新碼頭設「變壓房」喎，因為擔心渡輪泊岸嘅震動可能引致供電不穩，惟有另外喺新填海區選址，不過要明年初至可以完成。換句話講，新碼頭二樓要丟空半年做唔到生意，嚴重浪費資源，渡輪乘客飢腸轆轆想喺碼頭搵碇「醫肚」都唔得，唔媽媽聲至奇。
政府靠得住，豬乸會上樹，真係一啲冇講錯。渡輪泊岸會產生震動，呢個道理小學生都識，當局規劃變壓房居然冇諗到，有冇更腦殘啲吖。正如有立法會議員質疑，變壓房要另覓新址，根本係規劃失當。
唉，港產官僚做嘢，不嬲都係敷衍求其嘅喇，諗住係咁意畀一層渡輪公司出租，幫補吓收入，唔使一味加價引起民怨，惹禍上身，點知就做到甩甩漏漏，卒之咪搞出個大頭佛，累到渡輪公司得物無所用囉。
講開又講，就算準時供電，又有食肆租用，以非票務收入補貼渡輪公司呢個如意算盤亦未必打得響，因為問題根源正正係政府嘅補貼。係人都知，渡輪航線客源有限，經營困難，港府為免航線停辦，影響市民日常生活，提供適量補貼亦係無可厚非。問題係，補貼幾多至算適量好難釐定，而航線營運者有恃無恐，次次都以蝕錢為藉口，一邊攤大手板問庫房攞錢，一邊獅子開大口向乘客加價。
明眼人都睇得出，港府對渡輪公司要求補貼來者不拒，話為市民着想係假，方便自己卸責就真。只要勉強維持航線服務，咪無需費神改善離島交通網絡囉，至於航線服務有冇改善，收費係咪合理，一於闊佬懶理，納稅人就次次都要填呢個無底洞。
講到尾，新灣仔碼頭規劃失當，當局除咗要速速補鑊，更應檢討渡輪經營機制，諗計解決航線年年蝕錢，年年補貼，服務永無改善嘅惡性循環。叮！
