呢幾日，香港特區全城在講《白皮書》，加埋「全民公投」和「新界東北盲搶地之衝擊立法會」，已掠奪晒所有人的眼球；與此同時，教育局卻伺機靜雞雞「更新」基礎教育的課程指引，要小學教《基本法》，加深細路仔對「一國兩制」的理解，建立對「國民身份的認同」，基本上，就係將「愛國教育」重推上枱，借屍還魂，博鹹魚翻生。

不過，今劑強推的「新課程指引」卻多了一個有力的後台，就係《白皮書》，於是，赤紅教育團體才敢有恃無恐的喊陣。教聯會長黃均瑜說：「學校收到指引，當然要跟《白皮書》教啦！否則跟乜嘢？」並謂：「教聯會轄下學校教《基本法》時，要參考《白皮書》」云云。

有教學界學者贊同本港有必要在幼小階段向學生教授《基本法》的民主、普選及人權等概念，否則，會衍生好多「政治文盲」咁話！吓！怕呢度有「政治文盲」？難道要香港人提前「政治覺醒」？個個係「政治精英」？

醒啲啦！中共治國理念，係要樣樣管、全揸莊，佢畀乜你，你才可以有乜，不得未經准許而自作請求，連跪求都係罪呀！一切意識形態全控制呀！政治洗腦就有份，人民群眾是政治白癡就最啱！做文盲？算得係乜？最怕你們醒覺啫！

香港人無受文革之苦，也不看歷史，怎會知道文革時期，由林彪和四人幫吹捧的「三忠於四無限」吖？「三忠於」，是忠於毛主席、忠於毛澤東思想和忠於毛主席的無產階級革命路線；「四無限」，即對毛主席、毛澤東思想和毛主席的革命路線要無限熱愛、無限信任、無限崇拜和無限忠誠。

當年，受教的「愛國幼童」如今點呢？咪係最有權有勢有錢嘅土豪囉！你想仔女似佢哋的話，咪叫佢哋熟讀《白皮書》，同入讀教聯會轄下的學校囉！人格會係點？有辦睇啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps