SUN搞作：網絡小說：新車舊車

「死佬，我同你捱生捱死咁多年，仔都生幾個，依家你走去包小三？你揀，要佢定要頭家？」一睇就知係正室嘅女人，好激動咁交出一條選擇題，中佬於心有愧，低頭鵪晒鶉粒聲唔出。一波未平一波又起，另一邊嘅後生女，一手揪住中佬嘅衣領，開口就媽媽聲：「你識我嗰時已經話離婚，依家乜都畀晒你，仲同我拖拖拉拉？」

中佬畀兩個女人逼埋牆角，可憐嘅目光投向錯鑫，好日唔理嘢嘅佢竟然「出口救人」：「兩位阿嫂唔好爭喇，就好似我哋啲消防車咁，新嗰部咪拎出嚟做騷，招呼吓啲嘉賓囉，幾夠飛屎！用殘咗嗰部就繼續做實務，洗衫湊仔一腳踢，唔使錫住用o架！兩位阿嫂互相分工，你話幾盞呢！」就係咁樣，錯鑫又做咗新聞人物，今次唔係大花筒、入錯貨、刻薄下屬，而係衰多嘴畀兩個女人街頭狂毆，真係大快人心。