挾着「洋參大王」楊永仁之名登場嘅恒發洋參尋日舉辦投資者推介會，現場見楊永仁附近有位年輕女士，望落又有啲似楊永仁，原來係佢大千金。

楊永仁（中）出名皮光肉滑，仲叫記者摸吓添。

年近半百嘅楊生出名皮光肉滑，尋日仲叫現場記者摸吓係咪真係咁滑溜，睇到都相當讚嘆，但更吸引嘅係同楊生成個餅印咁樣嘅千金Karen。佢仲好撐老竇場，推介會同記者會都有去，但就比較怕醜啦。

Karen係楊生個大女，仲有細佬細妹喺外國讀緊書，聽講Karen依家喺楊生私人持有嘅另一間公司做，專做燕窩，咁又係，話晒燕窩養顏，係女仔都鍾意啦。咁唔通留番畀細佬妹接手阿爸盤洋參生意？

講番恒發洋參，現場除咗有參茶歎外，仲見到有月餅同麵，當然係有花旗參成分啦，聽講月餅今年中秋節就會登場，話同恒香合製，但會印番「恒發」個嘜頭。仲有三個月就到中秋，大家對花旗參月餅又有冇興趣呢？

第一手消息請下載on.cc東網iPhone/iPad/Android/Windows Phone Apps