城中鏡：99歲饒宗頤開心到站起
國學大師饒宗頤教授以其學術研究名聞於世，佢除咗係一位大學問家，亦擅長書法、書畫等藝術領域。饒宗頤文化館尋日慶祝第二期工程竣工，現年九十九歲嘅饒宗頤亦親自到場主持開幕典禮。雖然饒老大部分時間都要坐住輪椅，但望落佢仍然非常精神。儀式開始時，饒老喺其他嘉賓攙扶下慢慢企起身，親手將代表文化館嘅圖案貼喺展板上，然後不停向台下來賓講「多謝大家」，表現得好開心，其他嘉賓都戥佢高興。
饒宗頤文化館佔地三萬二千平方米。
饒宗頤教授（右）喺館長李焯芬攙扶下，向台下來賓致謝。
可以一分為四、又可四而合一嘅《荷花四屏》。
梁錦松（圖）話唔會因為「馬拉松」事件而影響同馬時亨嘅友誼。
馬時亨
位於荔枝角嘅饒宗頤文化館，佔地三萬二千平方米，前身係荔枝角醫院，之後被古物諮詢委員會評為三級歷史建築，並成為發展局《活化歷史建築夥伴計劃》中嘅首批活化項目，透過展館展出饒老嘅書法同畫作。
《荷花四屏》得意之作
饒宗頤學術館館長李焯芬教授透露，饒老對北宋著名哲學家周敦頤所寫嘅《愛蓮說》情有獨鍾，所以佢唔少畫作都係以荷花做主題，文化館內其中一幅可以一分為四、又可四而合一嘅《荷花四屏》，就係饒老嘅得意之作。
饒宗頤文化館建築群分上、中、下三區，設有「天光雲影」、舊更亭及古圍牆等景點供訪客參觀。本身係建築師兼畫家嘅立法會前建築界議員劉秀成，就讚揚建築群保存同活化得好好，別具歷史意義。佢就不時會到訪饒宗頤文化館，教小朋友畫畫同寫生。
商務及經濟發展局前局長「肥亨」馬時亨同前財爺「阿松」梁錦松亦有到場，一同欣賞饒老嘅大作同文化館嘅特色建築。肥亨早前猛咁放風，話阿松係下屆特首嘅合適人選，被外界稱作「馬拉松」，搞到阿松多番公開否認都冇人信。阿松尋日笑笑口咁話，兩人相識幾十載，肥亨已經幫佢澄清番，強調唔會因為呢啲事件而影響大家嘅友誼喎。
