政壇：搞搞政：侍產假法案政府打定輸數
受到預算案拉布戰嘅影響，立法會大會積累咗大量法案同議案有待表決。消息指依家排緊隊等立會大會三讀通過嘅法案堆積如山，政府內部都有先後緩急之分，當中最想盡快通過，當然係關乎樓市興衰嘅雙倍印花稅「辣招」草案。
設計圖片及對白
政府評估經歷上次買家印花稅草案，泛民扭擰一輪、最後被迫集體離場嘅鬧劇後，預計今次草案三讀會較少風浪，應可順利過關。
相比之下，本來看似簡單、由勞工及福利局局長張建宗負責嘅侍產假法案就波折重重，政府都打定輸數。事關勞工界同泛民表明會提出修訂，將草案原定只有三日嘅男士有薪侍產假增至五日或七日，以及將放假期間嘅工資由八成修訂為十足支薪，有一定機會通過分組點票。但當局認為三日侍產假，係經過勞工顧問委員會長時間討論而得出嘅共識，要推倒重來絕非易事。如果當局發現真係數唔夠票，不排除會暫緩甚至收回整條草案，大輸家將會係等到頸都長嘅打工仔。
至於由保安局局長黎棟國負責，有關變性人結婚權嘅婚姻條例草案，各黨派與政府之間嘅分歧亦相當大。
據聞政府認為即使最終立唔到法，終審法院有關變性人結婚權嘅裁決仍會生效，差別係到時邊啲個案先算變咗性、可以受惠於終院判決結婚，可能又要打過官司先確定到。
