全城波牛為巴西世界盃瘋狂，好似「莎莎老闆」郭少明尋日出席慈善晚宴時，透露公務繁忙，當晚十二時許便要啟程到外地公幹，故時間非常緊迫。再追問佢有冇抽空睇世界盃？佢笑住話：「你話呢？睇吓我對熊貓眼就知啦！我尋日有睇十二點嗰場。另外亦有捧英格蘭，不過成日都令我失望。」

施榮懷話自創睇波減肥法，就係齋飲水。

郭少明笑稱睇波睇到熊貓眼。

喺另一場合見到廠商會會長Irons施榮懷，佢寧願唔瞓覺捱更抵夜都要睇波，但係時間一長難免口痕想一路睇波，一路食吓花生同飲啤酒，但向來注重身形嘅Irons就自創一套睇波減肥法，就係齋飲水唔食嘢嘞！

Irons話唔好睇少齋飲水唔食嘢呢招，一來可以有飽肚感覺，唔使再食零食，二來飲完水當然要去洗手間，來來回回就可以令自己保持精神狀態，就算捱更抵夜睇波都唔怕眼瞓。

佢之後仲自爆單靠飲水呢招，最近已經減咗三磅，目標係未來減多幾磅至收手喎！

除咗全神貫注投入睇波熱潮，Irons仲小賭怡情，而且有唔少斬獲，但到底佢捧邊隊，佢話只係捧贏嗰隊，至於世界盃冠軍心水就睇好阿根廷，原因只有一個，就係隊中有佢至愛嘅球王美斯。

第一手消息請下載on.cc東網iPhone/iPad/Android/Windows Phone Apps