今年係證監會成立二十五周年，原來四分之一個世紀以來嘅港股市場變化真係可以好大，搜羅咗幾個具代表性數字，等大家見證吓香港證券市場如何大躍進！

二十五年前，即八九年，港股市值只有六千億元，吓！依家一間上市公司市值都唔止六千億元喇！但事實確係如此，港股市值依家已有二十三萬億元，增長逾三十七倍。上市公司數目，由八九年約二百九十間，增至一千四百多間，增長三點八倍。至於證監會持牌人數目，增長都好犀利，由當年嘅一千九百人增至三萬九千人，勁升十九倍。

有股壇前輩就話八九年時剛經歷八七股災無幾耐，股票市場元氣大傷，當時市值真係得幾千億元。「依家睇番金額就好似好少，但當時六千億元係好大數目！」不過，佢反而話近年多咗咁多上市公司喺香港上市，但成交額近年冇乜進帳，港股市值二十三萬億元也維持咗好耐，升極都升唔到上去，只能怪個股市唔生性，指數彈唔起！佢仲話如果恒指升上三萬點，港股市值可能會有三十萬億元，到時港交所可能就要開香檳嘞。

港交所都好耐冇開香檳，唔知「滬港通」十月開波時係咪應該諗諗佢！證監會二十五周年確係一個重要里程碑，證監會就快出年報，據聞年報中有個二十五年特輯，會搵番啲昔日領導同員工講吓前事，展望吓將來！

第一手消息請下載on.cc東網iPhone/iPad/Android/Windows Phone Apps