政壇：陳日君 李漢奸毅行變坐車
泛民爭取普選嘅名目令人眼花繚亂，多個泛民團體早前發起「絕食爭普選」運動，部分參加者聲稱無間斷絕食咗超過三百小時，期間仲可以好好氣咁返去立法會開會，事後唔少人質疑佢哋有冇造假，否則就足以列入健力士紀錄大全。泛民近日又改為發起「毅行爭普選」運動，其中現年八十二歲天主教香港教區榮休主教陳日君、現年七十歲嘅白鴿黨創黨主席李柱銘（李漢奸），更揚言會連續行足七日，每日行十二個鐘，即合共八十四小時。不過，尋日就有人質疑兩人「假毅行，真坐車」，有欺騙市民之嫌。
有市民目睹本應一直「毅行」緊嘅陳日君，昨早一度改為坐車中途插隊。
話說尋日上午十一時許，有市民喺將軍澳尚德廣場對出嘅唐明街，目睹陳日君同李漢奸一同乘坐一輛黑色七人車到場，然後前後腳落車，中途插隊加入毅行隊伍。
或延長時間谷投票率
有份參與毅行嘅泛民中人承認，陳日君因腳痛關係，一直有醫護人員睇住佢嘅情況，有時見佢大墮後於毅行隊伍，就會用車接送佢追上大隊，以免拖慢整個行程喎。至於冇聽聞有腳痛嘅李漢奸，點解亦同陳日君一齊坐車，對方就不置可否。
今次毅行運動，係為咗下周日舉行嘅「六二二」佔中公投做宣傳。負責投票系統嘅港大民研計劃尋日發表聲明，話佢哋喺最近兩日受到疑似黑客攻擊，聲稱今次攻擊嘅規模之大及時間之長，為香港有史以來前所未見喎。為確保所有希望參與嘅市民都投到票，佢哋會喺有需要時延長投票時間。即係又試「搬龍門」，誓要谷高個投票率囉！
