立法會財務委員會主席「星爺」吳亮星近排主持會議嘅手法，備受各方抨擊。泛民就炮轟佢濫用權力、胡亂剪布，剝奪議員提動議同發言嘅權利。建制派就不滿佢唔夠硬淨，剪布剪到拖泥帶水，搞到財委會連續開咗五個禮拜會議，都未表決到新界東北前期撥款，間接助長議會外嘅示威衝擊不斷升級。星爺尋日接受電台訪問時，就自言佢做財會主席為咗服務社會而承擔，並無怨言喎。唔知佢知唔知道來自各黨派嘅其他議員，都對佢滿肚怨言嘅呢？

設計圖片及對白

究竟建制派對星爺嘅怨恨有幾深？早前都寫過，一眾建制派議員設立咗個WhatsApp群組，供內部溝通之用，據聞呢個群組喺最近兩個禮拜五都幾乎被炸爆，有啲比較善意嘅留言，就係教星爺點樣主持會議同應付泛民啲無理取鬧嘅言行，但亦有唔少建制派不留情面咁，透過群組公開鬧爆星爺嘅處事手法。

長毛寫藏頭詩相贈

星爺尋日揚言，會喺本周五財會復會後立即剪布，透過其他建制派議員通過動議，限制每位議員最多只能提出一項臨時動議，避免再有泛民提出上千條動議拉布。但據聞建制派都係唔放心，擔心星爺到時畀班泛民玩得兩玩，又會衰心軟或者亂晒龍，決定趁聽日立會大會開會期間，同星爺「預演」一次兼「補習班」，以免佢喺本周五再次「甩碌」剪唔到布。

正喺荔枝角收押所服刑嘅社民連議員「長毛」梁國雄，就喺獄中寫咗首「藏頭詩」畀星爺，全文係「亮相逞兇剪義布、星夜闖關阻專權、仆前繼後護東北、街頭巷尾撐公投」。乜嘢叫做「藏頭詩」？就係串埋每句詩嘅第一個字就別有意思，各位讀者自己領會喇！

第一手消息請下載on.cc東網iPhone/iPad/Android/Windows Phone Apps