擦鞋上行下效 消防官僚混帳

嗱，現實當中真係有咁荒謬嘅事。話說消防處處長陳楚鑫本月下旬退休，處方準備為佢搞場「歡送大龍鳳」，內容包括模擬高空射水救火、消防員乘雲梯救人等，都幾豐富。不過咁，本報記者直擊喺沙田消防局舉行嘅綵排過程，發現消防處唔單止安排近百名消防員放低正經嘢專心綵排，仲動用最新嘅消防車做表演布景板，至於用來救火救人嘅消防車，反而要向其他分局「臨時拉伕」，仲係車齡達十五年嘅老爺車添，簡直離晒大譜！

即係咁，呢單嘢擺明消防官僚擦高層鞋，之但係擦還擦，唔好攞市民生命安全較飛吖。立法會議員就講得啱喇，係人都知新車快過舊車，如果因為派咗架舊消防車去救火，萬一延誤救援，邊個孭鑊先？

咁都未算最離譜，為咗騰出地方進行呢場「歡送騷」，沙田消防局將原本放喺局內嘅三個用作核生化洗消等救援用途嘅貨櫃，拖去小瀝源消防局，而用嚟拖動貨櫃嘅勾車竟然留喺沙田，即係話萬一發生核生化事故，要先從沙田派車到小瀝源攞櫃，至可以前赴救援。係人都知，救人救火，分秒必爭，等得救援設備山長水遠運到嚟，乜都燒晒喇。

講開又講，擦鞋文化已經係消防處嘅傳統，今次只不過「發揚光大」啫。嗱，好似前任處長盧振雄咁吖，退休前喺各區消防局舉行「告別探訪座談會」，當值消防員淪為「阿四」，幫手擔仔方便長官影集體相，又出動大型消防車做拍照布景板。仲有吖，消防處舊年搞水運會，有人為討好上級，竟然動員當晚要返夜嘅前線人員做義工撐場。唔知大家有冇發現，雖然呢類擦鞋活動五花八門，令人目不暇給，但係都有一個共通點，就係消防官僚為求攞威，不惜公器私用，至於會唔會對市民造成影響，會唔會延誤救援，關人個關啦。

正所謂，上樑不正下樑歪，做大嘅好大喜功，做細嘅自然有樣學樣，陳楚鑫醜聞多多，消防處自然亂象叢生。嗱，集體秘撈、知法犯法違反防火條例、消防局內開派對尋歡作樂……沒有最醜，只有更醜。至於巡查消防隱患等分內事，消防處幾乎交白卷，如果唔係，舊年又點會畀審計署踢爆十宗罪吖。

所以話啫，有人諷刺消防處已經淪為「消閒處」，真係一啲都冇講錯，旨意消防官僚救急扶危喎，蚊都瞓蛇都死啦，叮！