「牌頭」係近年好多人用嘅潮語，但係又係一個古老當時興嘅俗語。「牌頭」本來係玩「天九」或「牌九」嘅用語，意思係當每一局開始之前，洗好三十二隻天九牌之後，就會先一排排疊好骨牌。有一家會負責決定開牌方法，因為「天九」或「牌九」的派牌方法有很多，例如「中堀底出」、「中堀」、「兩邊飛」等，決定開牌方法就叫「開牌頭」。

作為一個香港人，難免有一點精神分裂，先天環境已令我哋嘅精神左右為難。香港嘅社會係奉行一國兩制，即係喺專制極權、一黨專政嘅「國家」治下，有以西方資本主義制度為主嘅自治政府。即係將兩個互相排斥嘅「社會主義」同「資本主義」意識形態夾硬擺埋一齊。今時今日，大陸已經演變成霸權資本主義嘅代表，對人權、平等同自由呢啲所謂「西方價值」嗤之以鼻，全國為拜權、拜金而不擇手段。香港被西方管治一百五十年之後，人民普遍接受西方嘅人道主義、自由平等呢啲普世價值。咁樣嘅環境底下，我城人民真係唔精神分裂都幾難；以致香港人都分兩大類，一班就係乜都唔理、有日過日嘅犬儒沉默嘅「大多數」，一班就係憤怒憂心香港沒頂嘅「香港良心」，有啲人精神分裂地游走兩種人之間，呢頭去包圍立法會衝擊警方，同時又會關心世界盃戰況落飛買波，睇「牌頭」落波纜，真係精神「Fun」裂！

後來，開「牌頭」就引伸成開出「條件」嘅意思，例如有人叫你去做嘢，你可以問：「開咩牌頭先？」意思即係問人有咩酬勞或者回報，有時甚至落酒吧猜枚，經常都會聽到開「牌頭」呢個潮語，意思即係問人每一局輸了要飲幾多，有啲似打麻雀，每次開局前問人「打幾大」咁嘅意思。

「牌頭」就被人傳吓傳吓，變成咗潮語。「牌頭」當然有辣有唔辣，雖然呢個世界有人有權開「牌頭」，但係大家都有權唔接受。好似中央可能因應政改同佔中，出份咩一國兩制白皮書，自說自話，開到個香港人絕不能接受嘅「牌頭」，呢個時候，香港人要逆來順受？定係還是堅決反抗？推牌洗過？Your Call。

第一手消息請下載on.cc東網iPhone/iPad/Android/Windows Phone Apps