政壇：搞搞政：為做醫學會會長史泰祖棄新民黨
新民黨近排動作多多，不但想擴闊地區直選版圖，仲有意進軍功能界別，例如金融服務界、會計界、醫學界等。不過，最新消息就話，該黨搶攻醫學界嘅如意算盤已經打唔響，因為有份同葉太齊齊創黨嘅史泰祖，為咗以獨立身份競選醫學會會長，已向葉太表明退黨。
設計圖片
史泰祖去年開始已經淡出黨務，唔再做新民黨副主席，只保留黨員身份。最近因為角逐醫學會會長，就有好多醫學界中人苦口婆心同佢講，如果佢孭住政黨之名，會員未必咁鍾意，勸佢盡快退黨。本來唔多想退黨嘅史泰祖都因此做吓問卷調查，發現班醫學會會員果然唔鍾意會長有政黨身份喎。所以，大概兩個月前，史泰祖就遞咗退黨信，當時葉太曾試過挽留，但佢仲係揀離開，仲話自己由創黨至今，參加過選舉，又做過副主席，咁多年嚟算有貢獻，對得住個黨，係時候換吓身份繼續服務社會。
退黨後，史泰祖就會拍住眼科醫生周伯展同兒科醫生陳以誠，合組內閣參選醫學會，佢做會長，周、陳兩位就做副會長。選舉報名期就快完，據聞佢哋三人仲未有對手，睇嚟史泰祖自動當選嘅機會非常之高。醫學會會長兩年一屆，兩年後就輪到立法會選舉，現任醫學界議員梁家騮無心戀戰，平時去湊女同做手術仲多過開會，史泰祖會唔會做完兩年醫學會，然後再戰立法會呢？
