政壇：葉振南滿肚計「吸才」

有六十幾年歷史嘅汕頭商會換屆在即，八月底就有會員大會，邊個做會長，好快揭盅。數吓手指，現任常務副會長葉振南（Stephen）已入會二十幾年，如果成功接掌汕頭商會嘅話，將會係商會歷嚟最後生嘅會長。

葉振南有望接棒成為汕頭商會歷來最年輕的會長。

坊間商會愈組愈多，個個會鬥搶精英，Stephen都滿肚大計，仲構思「吸才」行動，引入肯拚肯搏嘅「家己冷」，兼吸納年輕才俊，注入生氣同活力，「活化」汕頭商會咁話。

今年經濟市道麻麻，商家都大嗌生意難做。搞啤酒代理嘅Stephen逆市擴充，六月開信貸公司，莫非身家「水浸」？佢笑住話家族一向經營的士車行，有做「車按」，睇見信貸市場潛力大，索性大搞。朋友知道Stephen有錢借，個個封佢做「財神爺」，又開口問佢「度水」，搞到電話接唔停。