小事都做唔好，點做大事呢？嚴人嚴己嘅立法會議員劉慧卿一向注重黨友紀律，對黨友遲到早退、離開房門唔閂燈都要管，可惜最近有黨友唔生性，被人捉到喺立法會辦公室公家茶水間留低未洗嘅水杯，仲生晒霉菌好唔衞生。卿姐為整頓黨紀，喺黨內中央委員會例會上，教仔咁鬧黨友做事要有手尾，堂堂政黨例會搞到好似開家庭會議咁都幾「溫馨」。

卿姐已經唔係第一次將「飲完嘢要洗杯」呢類小學雞德育課題擺上會議討論，期間黨友單仲偕同李永達都有和議支持，據聞涉案者唔係區議員又唔係立法會議員，邊個連洗杯呢啲「雞毛鴨蒜」嘅事都做唔到呢？其中一個「嫌疑人」、黨總幹事林卓廷一聽就強烈否認，猛話自己平日淨係飲水以示清白，「未見過飲水嘅杯都會發霉囉」，仲話黨友唔記得洗杯好小事啫，無謂小題大做喎。唔知黨主席聽到又有咩反應呢？

第一手消息請下載on.cc東網iPhone/iPad/Android/Windows Phone Apps