政壇：荷蘭躉郭偉強 改名都要死跟
世界盃開鑼，城中大把人變熊貓族，曾經代表立法會足球隊出賽嘅勞工界議員郭偉強（Aron），前晚完成財務委員會會議後，都趕返屋企睇荷蘭狂掃衞冕嘅西班牙場波。Aron話自己唔係足球狂迷，但就對荷蘭隊情有獨鍾，仲力撐荷蘭九十年代中場溫達（Aron Winter），所以連英文名都跟埋人哋改做Aron。
郭偉強
Aron回想小學六年級先第一次睇波，雖然人仔細細可能連「越位」係咩都唔識，但對荷蘭國家隊嘅橙色波衫印象深刻，覺得橙色喺一片青葱草地上特別搶眼，仲對中場溫達個英文名Aron「一見鍾情」，未識睇波就幫自己改相同英文名，一直用到依家，仲由此對荷蘭隊有情意結，但就似乎冇咩人知佢叫Aron喎。講開橙色，佢所屬嘅工聯會都用橙色做主調，唔通當年都係因為咁而加入工聯會？
