今日係父親節,一班平時為做嘢而奔忙嘅爸爸好應該抖吓,尋日見到香港青年交流促進聯會創會主席龍子明出席活動,同場仲有佢個仔、身兼學生發展委員會創會主席嘅龍允生,佢哋父子感情好好,講到親子之道,龍子明好有經驗,仲分享吓早年帶個仔去井岡山嘅事。

龍子明(左)培養兒子龍允生自小多認識國家。

佢話,由個仔細細個開始,就培養佢多啲認識國家,好似個仔讀緊小六嗰陣時,佢就半推半氹咁,帶佢參加火車團去井岡山考察,初時個仔喊住咁話唔去,因為火車條件唔多好,小朋友未必捱得苦,點知,去完之後,個仔就話下次都要參加喎。龍子明究竟用咩嘢吸引個仔呢?定係呢啲就叫生命影響生命?

第一手消息請下載on.cc東網iPhone/iPad/Android/Windows Phone Apps