新界東北發展計劃嘅前期撥款,喺立法會財委會審議遇到大挑戰,仲搞到立法會畀人兩度衝擊添,示威行動可以講係完全失控。講起失控,好易令人諗起民政事務局前局長藍鴻震(藍爺),當年佢退休前响立法會提交《建築物管理修訂條例》被否決,當時佢就爆出經典名句「Everything under control(一切喺控制範圍內)」,今時今日,離開官場多時嘅藍爺又點睇﹖佢話,根本唔清楚班示威者為咩抗爭。跟住佢仲大講舊時嘅鄉郊土地問題。

設計圖片及對白

質疑冇去過新界東北

藍爺尋日响中央圖書館一項展覽活動中,講到立法會審議撥款遭到激烈示威時,佢話班示威者唔係為自己抗爭,因為大部分都唔係新界東北村民,佢仲懷疑,香港係咪有咁多見義勇為嘅青年人喎!藍爺話,以前新界村民激動同反對發展係有道理嘅,撇開佢哋嘅抗爭係咪正確,主要原因係以前啲村民擁有土地,世世代代住喺嗰度百幾年。但依家衝擊立法會班人,就冇呢啲淵源,佢仲質疑部分人根本冇去過新界東北土地。

有商界人士都話,見到前日立法會嘅示威者抗爭畫面,好驚香港嘅未來,認為成個社會氣氛愈嚟愈差,示威者嘅抗爭手法又愈嚟愈激,咁樣落去,對香港絕對唔係好事。依家示威者去立法會抗爭,都搞到一鑊泡,好多人都關注真係發生佔領中環行動(佔中),情況會唔會仲壞。

中華總商會會長楊釗就話,佢都聽聞有啲响中環嘅公司開始擔心,而佢間公司喺九龍灣,相信唔會受咩影響。佢自己定過抬油,仲同朋友講明,一旦佔中發生,可以借地方畀朋友做後備公司喎。

第一手消息請下載on.cc東網iPhone/iPad/Android/Windows Phone Apps