生活成本樣樣貴 安居樂業談何易

國際貨幣基金組織日前發表報告，指出本港樓價過去一年增幅全球第二高，泡沫危機嚴重，隨時崩圍。而本報比較香港同澳門、深圳、台北、日本同新加坡等鄰近地區嘅衣食住行成本後，亦發現香港除咗食之外，其他各方面都跑贏人哋成條街，特別係住屋開支簡直係「一枝獨秀」，問你怕未。

香港住房開支到底有幾高？講多無謂，數字最實際。以長沙灣一個五百平方呎單位為例，月租盛惠一萬四千港元，而新加坡嘅同類單位，月租只係一萬一千元，至於出名寸金尺土嘅日本東京，更只需要八千幾元咋。有人話，住屋成本係香港人無法承受之重，真係一啲都冇誇張！

樓價高，租金貴，香港邊有運行吖，唔怪得生活成本昂貴，生活質素每況愈下喇。開講有話，工字不出頭，年輕人有創意，梗係想一圓創業夢啦，之但係睇吓租金貴成咁，發夢都冇咁早喇。有從事手工藝品生意嘅年輕人大吐苦水，由於舖租同生活開支不斷上升，近年已經轉戰深圳，為方便工作，更索性搬埋上去住添。其實呢啲例子好普遍，如果唔係租魔肆虐，小本經營嘅店舖點會買少見少，又點會通街都係千篇一律嘅大型連鎖店吖？

廿一世紀最寶貴係人才，呢個道理小學生都明，問題係，香港地搵個竇口都難，生活壓力爆晒煲，莫講話吸引外來人才，有條件嘅本地薑都走夾唔抖喇。近年香港再度興起移民潮，除咗美加澳紐等傳統熱門地點，唔少人連台灣甚至瓦努阿圖都唔放過。正如學者話齋，香港住屋佔生活開支好大部分，生活質素被扯低，除咗中產考慮移民，外地人才都唔會願意嚟香港大展拳腳。呢，優才計劃形同虛設，每年批出嘅個案連原定目標一半都唔到，就知咩事啦。

有條件嘅人走得就走，走唔到嘅市民惟有面對現實，忍受不斷下降嘅生活質素。講到尾，香港民生問題千頭萬緒，主要都係房屋問題引起。冇錯，今屆政府有心對症下藥，將解決房屋問題列為施政重中之重，弊在社會泛政治化，加上政客乘機抽水，搞到當局拓土建屋處處碰壁。安居至可以樂業，房屋問題解決唔到，市民生活質素又點可能唔一跌再跌吖，再咁落去，香港遲早淪為第三世界都似，叮！