SUN奇古怪：SUN潮語：【你懂的】

最近有本書令到全城為之瘋狂，呢本書將「高度自治」帶入一個新紀元，呢個新紀元就係——玩完。呢本嘢變相對港宣布，所謂「一國兩制」，只有中央有權解釋，到底兩制嘅成分係乜，比重係點，你班港喱都無權話事。以後香港阿爺話乜，你就做乜，當初承諾啲咩「五十年不變」，都只係空談。阿爺話司法要向政府服務，咩三權分立呢啲西方法律觀念，可以唔使再跟。一切同中國接軌，下一步可能就係規定煮食要用地溝油！完全回歸祖國嘅工程，提早三十三年完成！很驚訝嗎？我在危言聳聽嗎？我在妖言惑眾嗎？有所謂嗎？香港人現在處身這樣存亡關頭依然無動於衷，全城只熱衷於四年一度嘅賭博界盛事，香港最重要嘅係咩？「你懂的」。

網上有幾個關於呢個潮語來源嘅說法，有一個係關於喺大陸某啲論壇，有人希望網友分享某名人嘅艷照，但係大陸明目張膽地公開要求色情資訊係被禁止，所以有網民就喺標題曖昧地要求，最後加句「你懂的」，即係我哋廣東話講「你明嘅」，用嚟表達一啲難於啟齒，又或者不方便表明嘅要求，就加一句「你懂的」，下刪二千字，總之，大家就心領神會便是。所以就算你一啲不合法嘅要求，都可以用一句「你懂的」去隱晦地表達，難怪呢句嘢喺冇人權同自由嘅中國被廣泛使用。一年容易又到示威遊行嘅旺季，今年警方仲高調拘捕示威者，仲咁啱法庭又將長毛梁國雄議員收監。香港唔使到二○四七，就好像已經全面回歸。到時就算「佔領中環」，香港都無法回天。到時你同我會點？你懂的。