立法會財務委員會仍然未能就新界東北發展前期工程撥款進行表決，發展局同建制派被激進泛民主派玩到頭都大埋之餘，連「跟隊」向財委會申請撥款嘅教育局都好頭痕，皆因教育局就職業訓練局推行職業教育及就業支援先導計劃申請約一億四千萬元撥款。由於局方唔知會議幾時會突然進行表決，所以多個出席會議回應議員提問嘅官員，都焗住長期留守立法會等候「被召喚」，更影響教育局官員落區計劃。

教育局官員等了又等都仲喺立法會等候室坐冷板櫈，但另一邊廂，由於臨近暑假，好多學校都趁考完試舉行畢業禮，教育局唔少官員都會獲邀到學校頒授畢業證書。據知教育局副局長楊潤雄就因為要困坐立法會，惟有改派其他同事出席幼稚園畢業禮，但人手緊張下有時想換都無人可以換，只好缺席而少不免得失邀請團體。財委會尋日再度宣布休會，唔知教育局官員坐呢張「冷板櫈」要坐到幾時呢？

第一手消息請下載on.cc東網iPhone/iPad/Android/Windows Phone Apps