政壇：譚文豪期盼港組裝機試飛
衝上雲霄係唔少人嘅夢想，若然能親手砌出一架飛機翱翔天際，相信更加珍貴。曾參選區議會同立法會嘅民航機師譚文豪，佢嘅老友兼同事Hank鄭楚衡喺○八年以二百多萬元買咗架RV-8組裝飛機，Hank根據說明書指示自行裝嵌，希望砌出一架屬於港人嘅飛機。民航處亦初步同意畀呢架飛機於赤鱲角機場進行一次起飛同降落，譚文豪期望明年初可以首次試飛，成為香港史上首架組裝飛機在港飛行。
譚文豪好期待組裝飛機明年初能首次試飛。（資料圖片）
RV-8組裝飛機裝嵌工程預料快將完成。（受訪者提供）
譚文豪話，Hank為可讓年輕人參與飛機裝嵌過程，曾向多間中學叩門，但多次慘食「閉門羹」。但皇天不負有心人，Hank最後得到聖保祿學校同意將飛機放喺校內，四年來與學生合力組裝。飛機將於下星期二首次公開亮相，到時Hank、譚文豪將聯同一眾參與者交代組裝進度細節同分享箇中點滴。
RV-8係一架單引擎螺旋槳雙座位飛機，長二十一尺、闊二十四尺，由於飛機龐大，學校一度要改動班房設計。依家飛機已砌得八八九九，早前已運送到赤鱲角機場香港飛機工程有限公司（HAECO）嘅大本營繼續裝嵌。譚文豪話，飛機由學校運出去嗰陣，需要拆走學校部分嘅窗，校方認真大犧牲！
