之前講過，立法會議會聯絡小組委員會計劃喺九月到北歐三國考察，而委員會尋日最新發出嘅通告竟顯示，十名報咗名嘅議員之中，KK馮檢基竟然以自費方式參加，的確難得，似乎佢真係好有心同好有金喎！不過，一問之下先發現，原來KK已退出今次訪問團，莫非係縮沙唔肯自費去考察？另一邊廂，議員范國威同陳家洛會喺本月十五日去英國出席研討會，范國威尋日仲主動向記者講解外訪行程，講明因為係用公帑喎！

設計圖片及對白

議會聯絡小組委員會嘅北歐三國之行，KK澄清話退出訪問團，只係因為九月咁啱撞正有事，要離港去英國啫。至於其餘九名報咗名參與外訪嘅議員又點呢？據悉，四名建制派議員因為未用晒任內嘅外訪帳目，所以都可獲全費資助，但五名泛民主派議員就因為部分人已用晒任期內嘅外訪帳目，所以秘書處只可提供三個資助名額，最後佢哋五人就分享呢三個資助金額喎。泛民經常批評政府同建制派大玩分餅仔，依家佢哋為外訪又瓜分啲資助金額，係咪雙重標準呢？

主動交代行程 似此地無銀

至於范國威同陳家洛就係響應英聯邦議會聯合會分會邀請，去英國倫敦西敏寺出席研討會，話探討議會民主、議事方式同程序喎。今次佢哋來往香港同倫敦嘅機票、住宿同膳食開支費用都會由立法會承擔。

范國威尋日仲專登向記者匯報，話好出奇點解立法會無議員有興趣參加，所以佢同陳家洛喺無競爭下就獲批做代表，又話佢哋五日行程緊迫，由於旅程係由秘書處用公帑畀錢，又避免大家以為佢哋偷懶唔開會，所以要先向公眾交代喎。其實議員一向用公帑去外訪都唔交代，范國威今次咁主動交代事件，確係令人感覺有啲此地無銀囉！

第一手消息請下載on.cc東網iPhone/iPad/Android/Windows Phone Apps