議員外遊爭崩頭 不務正業唔知醜

嗱，暑假又嚟喇，例牌又係尊貴議員周遊列國嘅黃金機會，立法會組織咗多個訪問團，有人遊北歐，有人遊以色列，亦有人去新加坡，可以講係各適其適，皆大歡喜。

即係咁，議員公務外訪唔係話唔得，只要真正有需要，並且以節約為原則，公帑用得其所，市民唔會反對嘅，問題係今次星洲行主要目的，居然係考察當地電子道路收費系統及所謂嘅智能路線訊息系統喎，咁就實在太無厘頭嘞。香港三十年前曾探討過電子道路收費嘅可行性，卒之因為反對聲音太大而擱置咗，依家仲考察嚟做乜呢？再講喇，新加坡實行電子道路收費制度已經十幾年，議員家陣至煞有介事考察一番，會唔會太後知後覺呢？其實，新加坡值得借鏡嘅地方唔少，例如強政勵治、養老制度、房屋政策、教育制度、公積金制度等，樣樣都好過香港，議員點解又唔識得考察呢？

最離譜嘅係，新加坡距離香港只有短短四個鐘頭機程，但係議員就可以揀坐商務客位，行程全部由公帑津貼，自己一分錢都唔使出，都咪話唔筍呀。

正所謂，欲遊之埠，何患無辭，議員巧立名目，借外訪之名行旅遊之實，早就唔係新聞咯。好似以色列訪問團咁吖，話去考察創新科技，本身已經夠九唔搭八啦，仲夠膽死六日行程得一日同公務有關，唔使問阿貴，其餘時間梗係去遊山玩水啦。鬼咩，原來每個議員任內有五萬幾蚊海外職務訪問津貼，食得唔好嘥，班政客仲唔絞盡腦汁製造外訪機會益自己咩。

真係諗極都唔明，香港大堆問題排住隊等立法會處理，點解佢哋仲有閒情逸致周遊列國o架？其實都可以理解嘅，議員不務正業，早就唔係新聞喇。呢，激進議員拉布拉上癮，家陣甚至發展到引示威者衝擊議會，真係睇見都眼冤。其他議員亦唔好得幾多，開會睇艷照有之，遲到早退搞到流會連連有之，再唔係就言不及義亂噏一通，立法會畀人叫「垃圾會」，唔係冇道理o架。

最好笑嘅係，立法會議員其身不正，但對官員就一啲都唔客氣，郁吓就要求問責，郁吓就要求落台，其實，佢哋只不過係五十步笑一百步嘅咋。

正所謂，有咁耐風流有咁耐折墮。邊個真心做嘢，邊個貪威識食，逃唔過市民雪亮嘅眼睛，政客又食又拎，遲早畀選民一腳踢走咋，叮！