城中鏡：徐立之任珠海學院校董
尋日先講過香港大學新校長馬斐森出席公開活動時，公關話佢仲係好新所以唔答問題，跟住就令人諗起前校長徐立之過往幾乎有問必答嘅情況，形成好大對比。
卸任港大校長後嘅徐立之，繼續為專上教育付出努力。（資料圖片）
繼獲委任為科技園董事局成員後，徐立之近日再有新動向。珠海學院尋日公布，徐立之由六月一日起出任該校校董，仲會擔任學術發展委員會主席一職，為珠海學院嘅長遠學術發展提供策略性意見同指導。珠海學院深信，徐立之可促進珠海未來嘅學術發展添！
徐立之喺接獲珠海學院嘅邀請時話，好樂意出任學院校董同學術發展委員會主席。而為咗配合將來嘅長遠發展，珠海日後將更積極邀請唔同學術領域嘅海內外專家學者加入學院，令學院嘅發展更上層樓。
