花旗香港環球個人銀行服務信用卡及無抵押信貸業務主管Maggie伍楊玉如，為咗幫公司出新產品，一早網購對高踭鞋，諗住襯埋活動嘅新裙，可惜遲遲未收到貨，點知喺活動當日一大早突然收到，相信今次個飲食會籍會十分「好腳頭」。

伍楊玉如（左二）喺搞活動當日朝早，竟然收到遲遲未到嘅網購新鞋，相信今次個飲食會籍會十分「好腳頭」。

網購有時未必咁穩陣，Maggie仲要係買高踭鞋，果然藝高人膽大，佢話都係為咗隆重其事啫！佢好坦言咁話，新鞋始終有啲刮腳。不過，睇佢穿上一套黑白色連身裙加上白色尖頭高踭鞋，效果咁好，乜都抵番晒啦！

花旗推出Gourmet Pleasures Plus飲食會籍畀佢哋嘅白金卡或以上客戶，等客戶去某啲高級食府食飯嘅時候，都可享折扣優惠。Maggie話香港人個個都識飲識食，亦好肯畀錢買優質服務，佢哋上年推出嘅黑卡，年費成二萬幾蚊，點知發卡量仲好過佢哋預期嘅4倍，所以對新推嘅餐飲會籍充滿信心，估計短時間內五千個名額好快滿。

第一手消息請下載on.cc東網iPhone/iPad/Android/Windows Phone Apps