政壇：搞搞政：「星爺」唔敢剪布 建制圍插
立法會財務委員會主席「星爺」吳亮星屢次「剪布」失敗，委員會今日再度審議新界東北前期工程撥款項目，立法會秘書處尋日下午突然發電郵通知財委會委員，指主席認為有關項目已有充分討論，決定今日會議開始即刻表決陳偉業提出嘅議案，隨即表決埋撥款項目。星爺可唔可以成功「剪布」仲未知，但據悉星爺呢招「快刀斬亂麻」，查實背後由建制派議員親自督導。
設計圖片及對白
集思會變批鬥大會
財委會上星期第五次開會，都未能就新界東北發展前期工程撥款進行表決，「拉布」議員除咗多次要求涉利益衝突嘅星爺避席，仲當面手指指「警告」會挑戰佢嘅劃線決定，完全被泛民撳住嚟打。不過，隨着「拉布」主力「長毛」梁國雄被判囚，多個項目亦已交財委會「排隊」表決通過，建制派眼見「剪布」實在係十萬火急，決定開會商討對策。
據了解，建制派議員臨時召開集思會暨「批鬥大會」，而喺集思會上不留情面咁「圍插」星爺，不滿佢堂堂財委會主席議而不決兼EQ低，遇着泛民「挑機」仲嚇到縮沙唔敢「剪布」，唔畀泛民玩殘就假嘞。建制派因此決定先發制人，要求星爺今日一開會就表決，極速「剪布」，總之「不成功、便成仁」。
