有學生影到高永文嘅局長座駕喺龍崗道double parking。（讀者提供）
好多人都知道食物及衞生局局長高永文係潮州人，好鍾意食家鄉菜，尋日就有位中五學生喺十二點半鐘放午飯時間，見到高永文現身九龍城龍崗道一間佢經常幫襯嘅潮州菜館。
原本高永文去幫襯開嘅「飯堂」食晏冇乜問題，但呢位學生就見到高局長率領同事入咗菜館後，佢架政府座駕就喺菜館對開馬路第二條線double parking（雙行泊車）。雖然高永文嘅座駕並冇阻塞交通，而且亦有司機在車上等候泊位，但係呢位學生就覺得作為局長應該以身作則，落咗車就叫司機駛走部車，唔好阻街喎。
食衞局發言人就話要同位司機了解吓當時情況，至於高局長當時係出席一個飯局，仲食咗滷水鵝同牛丸等招牌菜。其實自從高永文做咗局長後，日日喺金鐘政府總部返工，估計佢都唔係經常去九龍城開餐，但咁都被人撞到兼認得佢，真係唔知佢高民望係好事定壞事嘞！
第一手消息請下載on.cc東網
