政壇：葉劉發律師信要鄭經翰道歉
搞唔成數碼電台，現時轉搞網上電台嘅鄭經翰，最近又掀起風波。話說五月底佢開咪時講到海怡西商場事件，講到興起就話新民黨立法會議員葉劉淑儀同海怡商場大業主「扯貓尾」、「官商勾結」。同時人民力量袁彌明又將鄭經翰嘅發言片段放上YouTube。結果葉太睇完嬲到震，即刻出律師信畀鄭經翰同袁彌明，話言論涉及誹謗成分，要求兩人道歉兼刪除網上影片。
袁彌明
葉劉話，由於呢啲言論涉及新民黨同佢個人聲譽，一定要搞清楚，只要兩人道歉及澄清就無問題，所以唔算係「告」佢哋。佢仲話，由於YouTube係轉載媒體，所以都有發律師信畀YouTube，希望將片段立即刪除。
鄭經翰接受查詢時就話，對葉劉發律師信一事不予置評，只係強調自己開咪所講嘅全部係公正評論，作為傳媒應該受到保護。
