政壇：盛事基金當審計透明
「貪曾」前特首曾蔭權爵士喺○五年成立盛事基金，佢喺離任前幾個月，仲向基金撥款一億五千萬元作未來五年嘅營運費用，認真好關照。只可惜納稅人就大使冤枉錢，事關除咗睇唔到盛事基金點樣令香港成為亞洲盛事之都，最近還被審計報告揭發基金資助多宗疑似篤數嘅活動，變咗「醜事」基金，相信基金評審委員會委員實在難辭其咎。不過，政府竟然當審計報告透明，亦懶理社會對基金運作嘅批評，尋日公布基金全體委員再獲委任兩年，認真離晒譜！
設計圖片
其實貪曾一向都被指好大喜功，佢喺任內搞十大基建，成立盛事基金，呢啲項目成效係點？相信大家有目共睹。單講盛事基金方面，從前立法會議員謝偉俊時任旅遊界代表時，已狠批基金項目一啲創意都冇，為使錢而使錢，直至最近被審計報告揭發，基金資助多宗吸引旅客來港或創造就業活動均有篤數之嫌，包括香港龍獅節將學童列為受薪表演者，高爾夫球公開賽及英超勁旅曼聯訪港對本港球隊嘅賽事，幾乎派飛多過賣飛，又被人質疑基金其實係用來分餅仔，總之負面新聞多多，令人質疑基金對打造香港成為亞洲盛事之都嘅成效，咁嘅基金等於浪費納稅人嘅血汗錢。
林健鋒再度連任
政府尋日公布新一屆基金評委會委員名單，點知原來同基金資助嘅項目一樣，無新意！評委會主席由身兼行政會議成員嘅商界議員林健鋒再度連任，其他非官守成員除咗新增一名有會計背景嘅人士外，其他舊委員全體冧莊，任期一律延至一六年中。
大家係咪覺得好出奇呢？連做過廉署調查員嘅白鴿黨總幹事林卓廷都話，基金涉及咁多可疑帳目、誇大成效且有利益衝突，尤其林健鋒明顯疏於監管，政府唔單止唔向佢哋問責，反而再委任全部成員，真係荒謬，完全係摑咗審計報告一巴囉！
