公共事業吹加風 誰憐基層雪上霜
「糖又加！鹽又加！」歌仔都有得唱嘞，家陣香港加風勁吹，生活艱難，加價嘅又點止糖醋油鹽吖。呢，繼年年賺百億嘅港鐵將於本月底加價，九巴亦唔執輸，宣布下月初加價。公共事業排住隊加價，勢必帶動通脹，升斗市民生活百上加斤，怎一個愁字了得。
嗱，九巴去年已經加過價，點知事隔一年，尋日再得到行會批准加價百分之三點九。加價後，大部分乘客多付四角或以下車資，小部分要多付五角至一元以上。運輸及房屋局局長張炳良自我邀功，話今次加幅低過九巴提出嘅百分之四點三，亦低過物價指數變動，相信普遍市民可以接受咁話喎。
表面睇，九巴今次加價唔算飛擒大咬，尤其對比年年賺大錢嘅港鐵，加幅算係有「良心」嘞。不過咁，作為公共事業機構，一榮俱榮，一加俱加，勢必造成骨牌效應，掀起加風。係人都知，呢幾年公共事業機構爭相加價，兩電加完到煤氣，煤氣加完到港鐵，港鐵加完到九巴，衣食住行樣樣貴，可憐小市民人工唔見有得加，雪上加霜。
欲加之價，何患無辭。九巴大吐苦水，指受到港鐵競爭而令客量流失，大部分路線錄得虧損，加上油價及司機薪酬等成本持續上升，路線重組又阻力重重，無可奈何只好加價喎。即係咁，愈來愈多乘客選搭港鐵，區議會又力阻九巴路線重組，呢啲都係事實，加價可謂藉口多多，問題係，九巴仲有其他收益，單係巴士廣告收入已經唔少，只不過九巴運用財技，先令到收入冇咁好睇啫，加價究竟合唔合理，公道自在人心。
正所謂，人不為己，天誅地滅，九巴為咗自己利益而加價，唔難理解，之但係負責把關嘅港府，每次面對公共事業機構申請加價，一味大開綠燈，仲掉番轉頭幫人講說話，就真係咄咄怪事嘞。好似今次咁吖，張炳良幫九巴幫到出晒面，一方面細數九巴呢兩年點樣蝕本，點樣慘淡經營；一方面聲稱九巴加價後雖可轉虧為盈，但亦唔慌賺得多喎。張局長身為父母官，唔為市民發聲，反而一味為商家說項，唔知嘅話，分分鐘以為張局長先至係九巴發言人添！
所以話啫，港產官僚渾渾噩噩，對加價有求必應，難怪個個加得就加，予取予求。太一叮一直思疑，官員到底係為市民服務吖，定係為商家佬服務，公共事業機構唯利是圖，政府冇盡責監管，任由市民淪為俎上魚肉，任人宰割，結果咪產生「仇官仇商情結」囉，叮！
