尋日，當中共國務院失驚無神發表一份名為《「一國兩制」在香港特別行政區的實踐》白皮書時，引起香港「時政界」嘅嘈雜喧嘩，仲有啲九流評論員話要「細心研究」內容咁話，哼！咁都要費神？傻的嗎？強國呢一秒都知下一秒發生乜事，「認真」就低能鳥！

《白皮書》的文本重點，主要係再次再再次「肯肯定」香港人誤解「一國兩制」下香港的「高度自治」本意，以為「高度自治」就可以無王管的「自把自為」，嗱！老子講清楚你哋知，話明只係「高度自治」咋！而非「絕對自治」呀！「兩制」是從屬於「一國」o架！阿爺才是主場揸Fit人。

香港那班廢柴奴才，只懂跪求狗糧，一點本事都無，拿不出成績來，逼得佢哋嘅阿爺（佢哋o架咋）親自披甲叫陣，以《白皮書》掩護，直截了當講個明白：「中央擁有香港全面管治權」、「中央可直接行使權力」，哼！竟仲有傻仔問：「咁！《基本法》是否名存實亡呀？」喂！問呢啲？我識你老細o架！

何解，喺呢頭香港立立亂之際，中央會突然出重手辣招？有解說係劍指佔中喎！由一群下三濫低質嘅「愛字堆」、進而九流流嘅打呔五毛學者，再來潛伏垃圾飯民議員，或內地黨員法學專家，以至聞見棺材香嘅過氣京官都現身吶喊，皆擋不住「全民公投」，怎不叫阿爺氣急？

中央緊張的，不會理你小特區內誰當選特首，反正，全部選票皆在股掌控制中，佢哋至擔心的，係畀「少數人」起義成功，鄰近地區人民有樣學樣，咁仲得掂？呢樣至係要你小特區無運行嘅「死因」。

有人話《白皮書》絕非近期急做出來的產物，係已用了大半年工夫喎！講到中央的效率咁低？實相係近幾個禮拜，香港廢柴政府在政改方面交不出功課，兼局面亂得一團糟也！

惡魔早現真面目，是件好事，大家看清楚未？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps