城中鏡：翟少輕便Look陪老友買書

剛剛卸任監警會主席一職嘅資深大律師翟紹唐（翟少），放低咗一份重量級公職，時間多咗，果然如佢所言，騰多啲時間陪家人同朋友喎。

翟少（左）卸下監警會主席後，果然多咗時間，可以陪朋友逛書店選好書。

日前，我哋就見翟少趁假期現身金鐘太古廣場，當時佢喺間書店裏面，不過見佢就唔係睇書，而係陪朋友嘅兩個囡囡去買書啫。翟少一身上庭Look或者西裝Look大家就見得多喇，輕便Look就好少見，所以呢日見佢神態都特別輕鬆。

兩個小朋友企喺字典及工具書一欄前面左揀右揀，對如何寫作及語言教學一類書籍甚感興趣，足足揀咗成十五分鐘咁耐，而翟少就同兩個小朋友嘅爸爸傾偈等候，期間有講有笑。小朋友咁好學，大人梗係要鼓勵，唔知係咪咁，翟少仲掏腰包送咗兩本書畀佢哋添。