政壇：搞搞政：譚志源暑期遠遊難如願
暑假將至，好多人都心思思外遊，政制及內地事務局局長譚志源（Raymond）都話，佢想同太太齊齊放個悠長假期，四圍去吓，包括去非洲睇動物大遷徙及南極等地方，據講之後仲想去埋埃及睇金字塔添。
設計圖片及對白
根據過去慣例，Raymond喺暑假放假一、兩個星期，相信時間都唔夠去南極噃，如果去完南極再有目的地，真係有難度。點解Raymond咁想周圍去？為期五個月嘅政改諮詢上月初結束，港府正在整理收到嘅十多萬份意見，下月會向特首提交報告，預料會有新一輪爭拗，或者Raymond想喺下一輪政改大戰前夕，先叉足電。
依家建制同泛民主派喺特首普選立場係「大纜都扯唔埋」，但政府仲係未死心，努力尋找政治、法律上都可行嘅方案，Raymond都全力奮戰政改，呢個暑假想去南極睇怕都唔易，但佢同太太有咁浪漫嘅計劃，總會實現啫。
