政壇：鄭志剛揀蟀首重AQ高
「九十後」經常被批評工作態度消極唔夠進取、視野狹窄等，尋日一個大學生實習計劃開幕禮，新世界集團第三代接班人鄭志剛（Adrian）同剛接任華潤董事長嘅傅育寧都現場教路，教授青年人成功人生之道。Adrian話，佢請人時，最緊要睇「AQ」（逆境智商），應徵者成績同學歷反而係其次。點解呢？佢話依家年輕人缺乏AQ，因為好多人都未經歷過失敗、未輸過，當面對失敗時就唔知點算好。
鄭志剛（右）話請人最緊要睇「AQ」（逆境智商）。
後生仔唔識用影印機
Adrian又提到，曾經聽同事講，有啲後生仔連影印機都唔識操作，佢亦曾試過同啲青年人傾偈，十個之中只得兩個有睇國際新聞，但對於YouTube等資料就對答如流，仲話近期大熱嘅「厚多士」（好多事）事件都係由佢哋口中得知。
傅育寧就用自身經歷教導年輕人敢闖敢試，佢話年輕時讀水利工程，又係第一批去英國攻讀海洋工程，照計留在大學做研究可以高薪厚職，但佢偏偏想試吓自己實力係點，最終選擇出去打工。當時國企唔似現時咁勁，傅育寧話，如果唔係向外闖，自己可能仲喺大學教書喎。中文大學校長沈祖堯就鼓勵學生要走出香港睇世界，要「發大夢」，有學生曾經話想去台灣墾丁開間餐廳仔，佢形容呢啲只係「小夢」，年輕人應該「發大夢」喎。
