政壇：梁美芬話退出性小眾諮詢
多位藝人以至名人近年紛紛「出櫃」，佢哋與同樣「出櫃」嘅立法會議員陳志全成立咗「大愛同盟」，爭取同志平權。政府有見及此，政制及內地事務局一年前就成立咗消除歧視性小眾諮詢小組，本來諗住紓緩吓性傾向歧視立法嘅壓力。點知據聞最近一次開例會期間，支持同反對兩大陣營就性傾向針鋒相對，委員之一嘅變性人梁詠恩（Joanne）仲眼濕濕奪門而出，被指搞喊佢嘅基督徒議員梁美芬就反指小組想搞一言堂，話正式同主席講咗，認真考慮退出小組喎！
「係咪連問問題都唔得？」
消除歧視性小眾諮詢小組只係開咗四次會議，最新一次會議就喺上星期五舉行，主要由政府解釋澳洲、新西蘭等地點樣睇變性人，以至佢哋參與國際比賽，好似奧運咁。本來呢啲議題聽落冇乜爭議，點知梁美芬問咗一個問題：「依家討論緊嘅問題，同殘疾歧視有冇關係？」隨即惹起爭議，有人就即刻話性傾向唔係殘疾，梁美芬就澄清，佢唔覺得性傾向同殘疾有關，雙方跟住就互相開火。
支持同志平權一方就批評梁美芬「成日話自己係小眾」，但就問個不停，有心搞事，梁美芬就呼冤話，自己只係想了解多啲，委任佢就係想聽唔同意見，但當佢去到問嘢，對方已經有好大反應，質疑「係咪連問問題都唔得？」指對方係惡人先告狀。梁美芬仲話，已正式向擔任主席嘅中文大學副校長張妙清講咗，如果其他成員唔歡迎佢，佢會認真考慮退出。
