政壇：港交所拍動畫谷滬港通
自從內地宣布「滬港通」計劃後，各界都翹首以待，依家距離落實期約四個月，港交所將推出連串行動催谷，仲破天荒製作動畫介紹「滬港通」，聽聞港交所行政總裁李小加短期內更會飛往北美，向當地大型基金經理推介「滬港通」，佢哋瞓晒身，一副「只許成功，不許失敗」咁款！
港交所今次搞「滬港通」動畫，初期針對「北向交易」投資者，即係港人A股。佢哋將會製作六條短片，每條兩分鐘左右，介紹「滬港通」各個重要環節，好似投資額度、投資者資格、可投資股票範圍等等，港交所瞄準港人「乜都要快」嘅心態，務求用最快速、最簡單方法，將「滬港通」重點深入淺出講出來。除咗動畫外，港交所早前已經印咗大量「滬港通」小冊子同海報，放喺經紀行，派畀散戶。又同經紀行開咗N次簡介會，連串行動可謂不惜工本，總之就係加強投資者教育。
