政壇：泛民補位拉布
立法會幾線拉布令人煩！尋日工務小組開會，再次討論港珠澳大橋香港口岸上蓋規劃近六千二百萬元撥款，結果激進泛民繼續拉布，公民黨嘅梁家傑、工黨張超雄都和應，質疑政府當年申請填海時，冇建議過口岸上蓋會用作商業發展，依家又研究改建商業城，應該發還城市規劃委員會重新諮詢再議喎。
設計圖片及對白
結果，袋巾傑同其他泛民議員喺工務小組上咬住唔放，搞到個議程又要拖到下次再傾。
尋日嘅拉布行動由陳偉業（大舊）及范國威兩人補位，張超雄同袋巾傑亦多次發言齊齊拉布，張超雄就議題共發言二十六次，范國威亦共發言逾二十次，搞到建制派都強烈反彈。四小時會議中，大舊和范國威亦先後動議終止待續和休會，但均遭否決。大舊其後再提出兩項臨時動議，包括要求當局先諮詢東涌居民，及確保人工島發展不會令東涌空氣惡化，令會議未能趕及結束前表決，要下次再續。
大舊以政府當年並冇計劃商業發展，認為建議應該打番轉頭，去城規會重新審議，張超雄都話，口岸擬於二○一六年通車，但至今才申請撥款研究口岸上蓋用途，質疑當局欲將原有計劃推倒重來。仲有議員認為喺口岸發展「橋頭經濟」，係要將東涌赤化「變成強國人天下」。
區會贊成搞人工島
政府代表回應，指研究加入商業設施屬延伸發展，並非將計劃推倒重來；又指東涌擴展區可容納多十萬名居民，有需要在附近增加就業機會，但係咪需要發還城規會通過仍言之尚早。建制派議員都對泛民議員嘅言論好不滿，譚耀宗指出，離島區議會亦贊成發展人工島，「冇理由咁大地方只係做口岸」，批評發言議員指控不盡不實。
