漏夜制水無通知 水皮官僚大整蠱
「樓下閂水喉」係上世紀六十年代香港制水嘅經典一幕，勢估唔到，今時今日嘅香港居然出現制水苦況，仲要係事先無通知嗰隻，結果搞到數以萬計嘅食肆、商戶同埋居民大失預算，叫苦連天。你話喇，水務署今時今日咁嘅服務態度，係咪好應該改名做「水皮署」至啱吖？
太一叮冇誇張o架。尋日凌晨兩點左右，灣仔、銅鑼灣、跑馬地及大坑區所有樓宇及大廈，喺毫無預兆之下突然斷水，居民起身冇水洗漱，冇水整早餐，搞到要四出撲水救急，幾咁狼狽可想而知，不過最慘嘅係食肆完全做唔到生意，損失慘重。係人都知，上述地區係購物及商業重鎮，好多食肆通宵營業，食水話停就停，搞到倒瀉籮蟹，你話水務署係咪大整蠱吖！
嗱，好似一間知名日本拉麵店咁吖，因為突然冇水供應，搞到成晚做唔到生意，白白損失數百名食客，係真金白銀嚟o架。另一間連鎖茶餐廳負責人亦大吐苦水，話半夜兩點幾發現冇晒水壓，唔使十分鐘就一滴水都冇，被迫暫停營業，足足冇咗四分之一生意。最不可思議嘅係，有食肆打熱線查詢水務署發生乜嘢事，居然十問九唔知，官老爺咁嘅態度，簡直令人火上加油。
好喇，呢場制水鬧劇卒之搞到清晨七、八點先至陸續「落畫」，但部分跑馬地住戶依然要等到中午先有食水供應。面對千夫所指，水務署係咁講嘅，由於九龍輸水到港島嘅其中一個出水掣發生故障，基於「運作上需要」，惟有暫停供水，仲話已安排水車向市民提供食水云云。水務署就講得輕鬆喇，所謂水車，停泊位置冇雷公咁遠，加上交代得唔清唔楚，好多人都矇查查，根本於事無補。
即係咁，水務署出於工程需要而停止供水，本來無可厚非，只要預早通知，等大家有晒準備，根本唔會引發混亂同不滿。弊在水務署連及早通知咁簡單嘅事都做唔到，唔畀人鬧至奇喇。
點解次次斷水都搞到一鑊泡？除咗官僚處理不當，根本又係喉管老化所致。講真，喉管老化問題存在已久，呢頭爆完鹹水管，嗰頭就爆食水管，每年白白浪費二億元食水，你話水務署幾敗家吖！換水喉啫，又唔係神舟登月蛟龍入海咁複雜，拖足十幾廿年都搞唔掂，你話啲水皮官僚幾咁無能吖。
無計喇，港府大事唔識做，小事做不了，連制水咁小事都搞到亂七八糟，媽聲四起。唔該水皮署官僚好好檢討吓自己，下次制水提前單一聲得唔得？快啲換水喉得唔得？叮！
