城中鏡：夏千福動作多 特區高官隱形
美國駐港總領事夏千福同英國駐港總領事吳若蘭等八國領事，早前組成「小八國聯軍」到深水埗巡區，疑似為最近愈來愈少落區嘅特區高官代勞。兩人之後改為各自各精彩，吳若蘭高調會見咗多名負責對港政策嘅中央官員，又喺官邸大請泛民議員食早餐，近日又輪到夏千福大活躍，「接力」到柴灣參觀啤酒廠，又去頒獎又去睇扒龍舟，並旋即贏得上千名網民讚好，威過好多特區高官同中央駐港官員。
夏千福（右）日前造訪一間位於柴灣嘅美資精釀啤酒廠，短短數日就有近千網民讚好。（互聯網）
夏千福日前喺社交網頁，上載咗佢到柴灣參觀一間美資精釀啤酒廠嘅圖片。有人留言指若非夏千福親自參觀推介，佢哋住咗咁多年，都唔知香港有間咁嘅啤酒廠。有網民更建議佢去上水實地視察水貨客運作，然後再就限制個人遊問題發表美方意見。
