政壇：搞搞政：西九爛攤或搵盛智文啃
西九文化區計劃「衰收尾」，依家都唔知幾時先可完成晒三期工程，呢個「爛攤子」總要有人啃咗佢，據聞政府有意趁再次委任西九文化區董事局成員時順水推舟，一方面打破不成文嘅「六六原則」，委任三名董事局「老臣子」再坐一會，其中有傳盛智文留低係另有重要任務，就係為咗未來數年後，預備接手西九呢個燙手山芋喎！
設計圖片及對白
「六六原則」成員夠鐘
政府喺○八年委任十五名西九董事局成員，其中十一人做足六年，包括夏佳理、羅仲榮、盛智文、榮念曾、林健鋒、單仲偕、葉詠詩等人，按照「六六原則」，即同一公職不可擔任超過六年規定，以上十一人都「夠鐘」走人。
據聞政府內部反覆研究後，擔心西九董事局一次過大換血，無晒熟悉西九人士坐鎮缺乏延續性，思前想後終於決定叮走大部分「夠鐘」嘅成員，只破例續任夏佳理、羅仲榮同盛智文三名「老臣子」，底因係睇中佢哋各有專長，做好新舊交替工作。
此外，消息指政府嘅另一盤算係，西九文化區現時由政務司司長擔任董事局主席，但法例無規定一定由政府中人出任，加上西九係潛在政治大炸彈，政府一直有意將西九「外判」出去，據聞盛智文係其中一個可能人選，加上佢年底好大機會卸任海洋公園主席，由副主席孔令成頂上，到時佢更加有心有力全程投身西九工作，政府就可順勢將西九呢個歷史包袱推畀佢。究竟政府呢個如意算盤係咪打得響，就要睇下有幾大決心將之變成事實嘞！
