政壇：論壇蝦碌喇叭口冇聲出
話說有撐政府團體「中港青年文化社團聯會」尋日喺政府總部對出空地舉辦政改論壇，採訪通知寫住會有上水鄉事委員會主席侯志強、「幫港出聲」發起人何濼生等人主講，仲聲稱會有兩名演藝界神秘嘉賓到場。但最後神秘嘉賓失咗蹤、侯志強又放飛機，論壇安排亦屢爆蝦碌，真係唔搞好過搞。
有撐政府團體喺政總對出舉辦政改論壇屢爆蝦碌，包括將個喇叭口對住個地下。
多個傳媒尋日準時下午三點鐘到，諗住睇吓有乜神秘嘉賓，但最後等咗大半個鐘都唔見影。其後原本喺對面海出席緊另一政改論壇嘅何濼生終於趕到，但侯志強仍然未見。最後聯會副主席陳玉娥終於宣布，侯志強突然要開一個有關新界東北嘅會議，另一主講嘉賓亦因為有急事而缺席，得番何濼生一個「唱獨腳戲」，成個論壇遲咗個幾鐘先至開波。
聯會聲言佢哋之前已經搞咗六、七場政改論壇，但陳玉娥仍然唔係好識點處理個喇叭，不斷喺度嗌「試咪、試咪」，質疑個喇叭係咪壞咗，點解試極都冇乜聲。原來佢哋將個喇叭口對住個地下，咁就梗係冇聲出啦！最後要由一位台下市民出聲指正，佢先「如夢初醒」擺番正個喇叭。
