東區區議員李汝大加盟富貴黨。
富貴黨近年地區樁腳買少見少，有唔少資深黨員都走咗，但最近終於有好消息傳出，就係成功搵到東區區議員李汝大加盟，令該黨喺港島有六名地區樁腳，其中東區更有三人坐鎮，算係近年比較強嘅陣容。不過李汝大已達七十歲高齡，到底可以點幫富貴黨救亡，大家可以拭目以待。
後生一輩可能唔知李汝大係邊個，其實佢係政壇資深前輩，讀書時代係狀元，八十年代曾經係立法局議員，累積豐富嘅從政經驗，政圈一直視佢為泛民中人，然而近年同建制派中人時有互動，好似前年曾因同建仔鍾樹根有私人交情，所以借出多個橫額位置畀對方，但多年來都保持獨立無黨派嘅身份。
消息指李汝大一直雄霸北角丹拿選區多年，但始終有番咁上下年紀，所以有人估計富貴黨搵佢入黨，一來睇中佢喺地區嘅實力，二來可能係想搵人繼承佢衣鉢，相信佢是留是退，好快就會明朗化。
第一手消息請下載on.cc東網
