政壇：鬍鬚曾變身末日博士
天文台近日多次發出酷熱警告，但財爺鬍鬚曾最新一篇網誌，就揀咗「雪上加霜」做標題，由本港嘅立法會拉布戰，講到北美、歐洲、以至亞洲嘅經濟同政局動盪不安，香港更受到出口疲弱同零售銷售收縮雙重打擊等，情況猶如著名末日電影《明日之後》嘅情景。鬍鬚曾由成日高呼「狼來了」嘅「守財奴」司長，進一步變身為預告「六月飛霜」嘅「末日博士」，香港人心血少啲都畀佢嚇死。
設計圖片及對白
鬍鬚曾喺網誌鬧拉布，已經鬧咗N次，日前立會因「正盲毛」毛孟靜亂響鐘而意外流會，就為佢提供咗更多寫作材料。佢提到立法會距離七月中暑假休會，只餘下五次大會會議，今次流會令議員唔見咗兩日寶貴嘅開會時間，情況可謂「雪上加霜」，擔心會令雙倍印花稅等重要法案延誤；而立法會大會需要加班開會處理積壓議程，亦令到依家仲未拉完布嘅財務委員會同工務小組委員會更難加會，政府撥款同工務工程「大塞車」嘅問題惡化。
強調破壞容易建設難
其後佢筆鋒一轉，無喇喇講起舊年底至今年初發生嘅北美大風雪，指北美天氣最壞嗰時，情況猶如《明日之後》內嘅情景，佢喺當地居住嘅細路及家人，幾乎每日都要上街剷雪，並因為有大樹倒塌而整爛咗個屋頂，美國首季經濟亦受呢場天災影響而出現負增長。
之後愈講愈得人驚，佢警告歐洲經濟復甦緩慢、多國政局不穩；亞洲方面，日本調高消費稅後零售銷量顯著減少、泰國又發生軍事政變、越南更出現排華騷亂，直接影響香港首季嘅貨物同服務出口，預計第二季情況仍然疲弱；再加上四月份本港嘅零售銷售，疑似受到連串針對內地旅客嘅「驅蝗」行動影響而大幅收縮，令人擔心失業率會掉頭回升，希望大家從多角度考慮減少個人遊旅客呢個課題喎。
鬍鬚曾最後強調，「破壞容易建設難」，少數人嘅激進言行，除咗情感宣洩之外，對改善情況冇乜幫助。但話說回來，鬍鬚曾將香港以至全球情況講到好似世界末日咁，又係咪另一種形式嘅宣洩？對改善情況又有乜幫助呢？
