稚子返學奔波苦 官僚裏外不是人

係人都知，近年返港讀書嘅雙非童不斷增加，導致小一學額僧多粥少，北區更加成為重災區，結果唔少跨境學童被派到冇雷公咁遠。即係咁，愈多人爭即係愈多人失望，有跨境學童嘅家長知道仔女獲派到天水圍學校，徬徨不已，泣不成聲；有家長甚至話準備「長期作戰」，會喺北區學校逐間叩門。尋日嘅北區統一派位中心愁雲慘霧，唔知嘅仲以為舉行緊家長控訴大會，真係七國咁亂。鬼咩，學童每日舟車勞頓，花幾粒鐘返學放學，唔徬徨就假！

點解會出現咁不堪嘅局面？之唔係港產官僚冇做好份工囉。由於跨境學童不斷增加，當局增設「跨境學童專用校網」，並且喺部分地區校網推行加班或加派等臨時措施，點知滿足唔到跨境家長需要之餘，仲令本地家長怨聲載道，未解決問題，先製造新嘅矛盾，你話係咪添煩添亂吖。

老實講，稍有常識嘅都知呢個所謂專用校網行唔通啦。有數得計，參加專用校網派位嘅跨境學童大約有一千六百人，預留畀佢哋嘅北區學額只有三百個咁大把，其餘就要去東涌、馬鞍山甚至黃大仙等遠離邊境嘅地區返學。企喺雙非家長角度，小朋友明明係香港人，點解要被「流放」，分明玩歧視啫；至於仔女唔能夠原區返學嘅北區家長咯喎，更加條氣唔順，覺得跨區學童搶佔資源。嗱，呢啲咪叫豬八戒照鏡，裏外不是人囉。

咁都唔止吖。跨境學童除咗令北區壓力大增，亦連累其他「墮網」嘅學校。好似交通配套咁吖，要唔要為跨境學生安排校車，就令唔少學校相當頭痕嘞，更令家長擔憂嘅係，學校為接收新增學生可能要擴班，教學質素會唔會受影響呢？

真係諗極唔明，雙非學童回流唔係今時今日嘅事，當局點解一直諗唔到有效措施o架？冇錯，跨境學童問題積重難返，前朝貪曾政府係始作俑者，但咁唔代表現屆政府可以翹埋雙手，關人個關o架。教育界人士一早建議喺邊境地區起多啲港人子弟學校，接收雙非學生，既可方便小朋友就近上學，又可紓緩本港學額不足，一舉兩得，點解當局一直置若罔聞呢？

嗱，咪話太一叮唔提醒呀，雙非問題影響深遠，先係病床不足，依家係學額不足，未來房屋、福利、就業等問題將會接踵而來，一個比一個棘手，港產官僚準備好未呀？叮！