潮語「爆技」嘅意思，即係講當你打機時，某個玩家選用嘅角色，有特定嘅技能。如果特定嘅技能升到某個階段嘅時候，就不能再提升。呢個情況就稱之為「爆技」，即係某技能已經去到最盡咁解。另一方面，有某啲電腦遊戲，某啲角色可以裝備多個技能，裝滿所有技能亦稱為「爆技」。

經典遊戲「俄羅斯方塊」慶祝誕生三十周年，呢個俗稱「砌磚」嘅遊戲，相信好多七十後都唔會感覺陌生。那些年，學生放學後並唔係去圖書館，而係去機舖打番幾手先至會返屋企。那是一九八○年代中葉至九十年代中嘅時期。當時，「機舖」真係多過米舖。除咗「俄羅斯方塊」之外，仲有好多電子遊戲，令當時嘅仔，包括我，不斷貢獻零用，甚至犧牲成績，換取積分。到底溫習化學緊要啲？定係打「街霸」緊要啲，當然係打「街霸」緊要啲。最可怕嘅係，當時打機打得最多最叻嗰班，又可以喺考試攞幾條A，最後仲考入大學。所以，幾時都話打機係益智，不過睇你點打。時至今日，機舖已經係夕陽行業，依家行入機舖只有中年大叔同上咗年紀嘅無業人士，對住依然斑爛嘅畫面，消耗着生命。更多嘅人，依家只會對住部智能手機，日捽夜捽只求「爆技」，升呢搶分。但係遊戲設計，同當年「俄羅斯方塊」，其實唔差幾遠！

如果用之於日常生活中，「爆技」就係指某人某方面嘅技能，已經去到爐火純青嘅階段，即係堅到無辦法再堅。例如立法會主席嘅剪布技術，已經去到「爆技」嘅水平。又例如某某人嘅語言偽術，已經「爆技」。喺辦公室，如果有人吹水吹到曉飛，都可以話佢吹水吹到「爆技」。可惜嘅係，人生不如打機，冇得熄機開過重新開始。歷史亦都係一樣，唔可以玩完再嚟過。面對一個造假造到「爆技」嘅國家，兼且仲要逼你臣服於佢嘅國家，作為普通人，只有「容忍」到「爆技」先至頂得順。咁如果都仲頂唔順，咁點呢？咁就只有……爆！

第一手消息請下載on.cc東網iPhone/iPad/Android/Windows Phone Apps