政壇：搞搞政：白鴿黨公文袋鬧分裂無晒隊形
泛民主派兩大政黨白鴿黨同公文袋，雖喺議會各有六席，但近年因黨內內訌勁，個人主義橫行，黨內人你有你講，我有我講，毫無默契，個黨裂痕愈嚟愈深。難怪有人話，兩黨內部四分五裂，無晒隊形可言，再加上衰嘢一籮籮，真係救番都嘥藥費。
設計圖片及對白
公文袋骨幹成員一早就貌合神離，六個議員喺立法會內更漸行漸遠，好似湯家驊、郭榮鏗同郭家麒三人早前喺上海政改之行就各行各路。公文袋嘅唯一女將毛孟靜，又盛傳佢同黨友陳家洛冇偈傾，近年仲改行「本土」路線，唔講仲以為新民主同盟嘅范國威先係佢黨友。
江湖仲傳聞，公文袋成員幾乎一人一黨派，早前有高官幾經辛苦邀約五位公文袋議員共進早餐，想話約齊人坐低慢慢傾。點知五位黨友櫈都未坐暖已經嘈到面紅耳赤，有人仲中途拍枱離席，實在好難入正題傾正經嘢。白鴿黨同樣被指分裂為三派。黨內一班「孤兒」乳鴿就轉行激進路線博上位，溫和老鴿又睇唔順眼，最終白鴿又係三不像，俗語話，勉強冇幸福，兩黨唔通好快又嚟一個「合久必分」？
